Rapora Derbarê Lêpirsîn û Teqîbatên Arasteyî Serokê Baroya Amedê, Lijneya Rêvebir û Parêzerên Endamê Baroyê Ya Sala 2020'an Ji Hêla Navenda Me Ya Mafên Parêzeran Ve Ji Raya Giştî He Hat Pêşkêşkirin...

Kedkarên Çapemenî Yên Hêja û Hempîşeyên Min Ên Rêzdar;

Beriya ku ez dest bi axaftina xwe bikim, dixwazim destnîşan bikim ku em serokê xwe yê ebedî nemir Tahir Elçî û hemû hempîşeyên xwe yên ku jiyana xwe ji dest dane bi rêzdarî û minetdarî bibîr tînin..

Em rojeke din a Parêzeran bi rewşek ji qeyranên giran ên hiqûqî, siyasî û civakî dagirtî, bi zextên ku parêzer dûçar dimînin û bi pirsgirêkên pîşeyî ku bi dijwarî têne hîs kirin pêşwazî dikin.

Em wek Baroya Amedê bi hinceta 5'ê Nîsanê Roja Parêzeran; em dê îro hem nêrîn û pêşniyarên xwe yên di derbarê lêpirsîn û teqîbatên ku di nav sala 2020'an de arasteyî endamên me yên lijneya rêveberî û hempîşeyên me yên ku endamên baroyê ne hatine vekirin hem jî li ser pirsgirêkên ku di rojeva welêt û civakê de ne bi raya giştî re parve bikin .

Li gor rapora ku Navenda me ya Mafên Parêzeran di derbarê lêpirsîn û teqîbatên ku di derbarê hempîşe û endamên Lijneya Rêvebir a Baroya me de di sala 2020'an de hatine vekirin amade kiriye;

Di dîroka 12.03.2020'an de di wergiriya lêpirsîna ku ji hêla Serdozgeriya Komarê ya Rihayê ve hat meşandin de, di derbarê 5 hempîşeyên me de ku qeydkiriyê Baroya Amedê ne biryara girtin û binçavkirinê hatiye dayîn. Di wergiriya vê biryarê de 2 hempîşeyên me yên endamên Baroya me hatine binçavkirin û di derbarê 3 hempîşeyên me yên ku ne li mala xwe bûn jî biryara girtinê hatiye derxistin.

 

Di dîroka 20.11.2020'an de bi biryara hincetî ku ji hêla Dadgeriya Komarê ya Sulhê ya Amedê ve hatiye dayîn ji bo biryara girtin û binçavkirina ku di derbarê 32 hempîşeyên me hatiye dayîn operasyon hatiye destpêkirin. Di vê operasyonê de 21 ji wan endamên Baroya me, 1 ji wan jî endamên Baroya Semsûrê li malên 22 hempîşeyên me lêgerîn pêk hatiye, kompîtor, têlefon û hin pirtûkên wan hatine desteserkirin û hempîşeyên me hatine binçavkirin. 20 hempîşyên me yên qeydkiriyê Baroya Amedê ku hatibûn binçavkirin piştî ku îfadeyên wan hatin girtin di heman rojê de ji Gerînendetiya Ewlehiyê serbest hatine berdan. Yek (1) hempîşeyê me jî ji hêla Dadgeriya Komarê ya Sulhê ve bi sepandina kontrola edlî serbest hatiye berdan. Lêpirsîna derbarê Hempîşeyên me hîn jî berdewam e.

 

Bi îdiaya beşdariya hin çalakiyên KCD'ê ku ji sala 2007'an û vir ve li Amedê di fealiyetê de ye bûne gelek hempîşeyên me di navbera salên 2017-2020'an de hatine binçavkirin. Herî kêm di derbarê 12 hempîşeyên me de ji ber beşdariya wan a hin çalakiyên KCD'ê di wergiriya xala 314/2 ya TCK'ê bi tawanbariya "endamê rêxistinê ne" doz hatine vekirin. Ji Prz. Fethî Gumuşî re ku di navbera salên 1990-1994'an de peywira Seroktiya Baroyê kiriye 7 sal û 6 meh cezaya hepsê, dîsa ji Prz. Mehmet Emîn Aktarî re ku di navbera heyamên 2008-2012'yan de peywira Seroktiya Baroyê meşandiye û ji (1) hempîşeyek me yê endamê Baroya me re jî 6 sal û 3 meh cezaya hepsê hatiye dayîn. Li gorî tespîtên Navenda me têkildarî heman tawanbariyê di derbarê pênc (5) hempîşeyên me de biryara beraetê hatiye dayîn, herî kêm di derbarê çar (4) hempîşeyên me de jî hîn doz berdewam in.

- Di derbarê Serokê Baroya Amedê Ahmet Ozmenê ku di navbera salên 2016-2018'yan de li ser peywirê bû û endamên Lijneya Rêvebiriyê de ji ber xebatên baroyê du dozên cuda hatine vekirin. Daxuyaniyên Baroya me ku mijara dozê ne;

-Nivîsa bi dîroka 24'ê Nîsanê û bi sernivîsa "24'ê Nîsanê / Karesata Mezin: Em Êşa Gelên Ermenî Parve Dikin".

-Nivîsa bi dîroka 18'yê Berfanbara 2017'yan û bi sernivîsa ‘’Cezakirina Daxuyaniya Kurdistanê Şerm e, Nayê Nebûlkirin’’

-Rapora bi dîroka 14'yê Îlona 2017'yan û bi sernivîsa ‘’Bajarê Colemêrgê Gundê Tale (Ogûl) Hêla Kanîreş (Bûyera Ku Di Encama Mudaxileya Sîhayê Hat Jiyandin)’’

 

Têkildarî van îdîayan, li ser daxwaza Serdozgeriya Komarê ya Amedê di derbarê Endamên Lijneya Rêveberiya Baroya Amedê de ji tawanbariyên "Bi Aşkerayî Tehrîkkirina Gel a Bi Kîn û Dijmintiyê, Biçûkxistina Meclisa Netewe ya Mezin a Tirkiye û Neteweya Tirk", ji hêla Wezareta Dadê ve biryara "Dahina Destûra Lêpirsînê" hatiye dayîn, pişt re jî doz hatiye vekirin.

 

Dîsa di derbarê Ahmet Ozmenê ku di navbera salên 2016-2018'yan de peywira seroktiya baroya me dimeşandin û Endamên Lijneya Rêveberiyê de; Ji ber daxuyaniya bi dîroka 24'ê Nîsana 2018'yan û bi sernavê "Em Êşa Mezin a Gelê Ermenî Ya Bêsekin Parve dikin" lêpirsîn hat destpêkirin, li ser destûrdana lêpirsînê ya ji hêla Wezareta Dadê ve ji tawanbariyên "Bi Aşkerayî Tehrîkkirina Gel a Bi Kîn û Dijmintiyê, Biçûkxistina Meclisa Netewe ya Mezin a Tirkiye û Neteweya Tirk", doz hatiye vekirin. Ev her du doz pişt re hatine yekkirin û hê jî berdewam in.

 

Lêpirsînên Ku Di Derbarê Endamên Lijneya Rêveberiyê û Serokê Baroya Me De Ku Hê Jî Li Ser Peywirê Ne Tên Meşandin û Dozên Ku Li Wan Hatine Vekirin

 

Ji ber daxuyaniya çapemeniyê ya nivîskî ku di 24'ê Nîsana 2019'yan de li ser malpera web a Baroya Amedê hat weşandin, ji hêla Serdozgeriya Komarê ya Amedê ve lêpirsîn hatiye destpêkirin. Li gorî bendên Zagona Parêzeriyê dosye; ji bo destûra lêpirsînê ji Wezareta Dadê re hatiye şandin. Li ser destûrdahina lêpirsînê û pişt re destûrdahina teqîbatê ya Wezaretê li gorî xalên Zagona Parêzeriyê ji bo mijara biryardahina vekirin û venekirina lêpirsîna dawî dosye ji Dadgeha Cezaya Giran a Êlihê re hatiye şandin, Dadgehê di encama darizandinê de ku li ser dosyeyê pêk aniye biryara "vekirina lêpirsîna dawî" dahiye û dosye ji Dadgeha Cezaya Giran a Amedê re şandiye.

 

Di malpera webê ya Baroya Amedê de li ser daxuyaniyên ku Serokê Karên Diyanetê Alî Erbaşî di dîroka 24'ê Nîsana 2020'an de di xutbeya Înê de bi serenava "Remezan: Perwerdehiya Îrade û Sebrê" dahibû Baroyê di malpera xwe de bi niviskî weşandibû ku daxuyanî "bilêvkirinên nefretê vedihewînin û bi wê qedexeya cihêkariyê hatiye binpêkirin".Ji ber vê daxuyaniyê di derbarê Serokê Baroya me û Endamên Lijneya Rêveberiyê de lêpirsîn hatiye destpê kirin, lêpirsîna ku hatiye vekirin berdewam e.

 

Baroya Amedê di 24'ê Nîsana 2020'an de li ser malpera webê û hesabên xwe yên medyaya civakî daxuyaniyek nivîskî di derbarê "Tehcîrkirina Ermeniyan a sala 1915'yan" de daxuyaniyek nivîskî weşandiye. Ji ber daxuyaniya çapemeniyê ya nivîskî ku di 24.04.2020'an de derbarê qirkirina ku li ser gelê Ermenî pêk hatiye di malpera webê ya Baroya Amedê de hatiye weşandin di derbarê Serokê Baroya Amedê û Endamên Lijneya Rêveberiyê de ki hêla Serdozgeriya Komarê ya Amedê ve lêpirsîn hat destpêkirin. Ev lêpirsîn hîn jî berdewam e.

 

Li ser nîqaşa şêweyê ku di dema danişînê de di navbera Serokê Baroya me Prz. Cîhan Aydin, hempîşeyên me Prz. Yûnûs Mûratakan û Prz. Mehmet Nûrî Denîzê ku beşdarê lêpirsîna hempîşeyekî me ku di dîroka 28'ê Pûşpera 2020'an de bi daxwaza girtinê sewqê Dadgeriya Ceza ya Sulhê hatibû kirin û dadgerî de hatiye jiyandin li ser heqareta ku dadgerî li hempîşeyên me kiriye di derbarê vê bûyerê de ji hêla 51 Baroyan ve daxuyaniyek hevpar hatiye kirin ji ber tevger û gotinên dadgerî yên tije heqaret ku arasteyî Serokê Baroya me û hempîşeyên me bilêv kiriye dadger hatiye şermezarkirin û ji bo peywira xwe bi cih bîne HSK ji bo peywirê hatiye vexwendin. Piştî vê daxuyaniyê, li ser danebihîza tawanê ku ji hêla Dadgeriya Cezaya Sulhê ve hatiye kirin di derbarê Serokê Baroya me û hempîşeyên me de li ser Benda 6/1. a Zagona Têkoşîna bi Terorê re lêpirsîn hatiye destpêkirin. Ji gilîkirina ku di Lijneya Dadger û Serdozgeran (HSK) de kirine jî hê jî tu pêşketinek pêk nehatiye.

 

Di sala 11.10.2019'yan de, li ser navê Navenda Sepanê ya Mafên Jinan a Baroya Amedê, ji ber daxuyaniya nivîskî ku di malpera webê ya Baroya me de bi awayê “Em destnîşan dikin ku îtîrazkirina şer û daxwazkirina aşitiyê mafek mirovî ye û di bin her şert û mercî de dibêjin JI ŞERÎ RE NA! AŞTÎ HEMA NIHA!" bidawî dibe, di derbarê Serokê Baroya Amedê û Endamên Lijneya Rêveberiyê de lêpirsîn hatiye destpêkirin, ev lêpirsîn hê jî berdewam dike.


Di derbarê 18 hempîşeyên me yên ku di rapora ku em dê pêşkêşê we bikin de cih nagrin lê ji ber ku di wekaletnameya ku di lêgerîna Adara borî ya li Komeleya bi navê MEBYA DER'ê de hatiye dîtin navê wan derbas bûye lêpirsîn hatiye destpêkirin; xebatên pîşeyî yên hempîşeyên me yên ku li hember sepanên derhiqûqî yên arasteyî kesên ku tên binçavkirin têkoşîna hiqûqî dimeşînin hatiye astengkirin.

 

Digel çalakiyên sazûmanî yên Baroya Amedê, çalakiyên pîşeyî yên endamên wê bi pergalî dûçarê lêpirsîn û teqîbatê dimînin. Tevî Serokê Baroyê û endamên Lijneya Rêveberiyê ku di navbera salên 2016-2020'an de peywirê girtine, di sala 2020'an de herî kêm di derbarê 69 hempîşeyên me de ku endamên Baroya me ne, ji ber fealiyetên xwe yên pîşeyî û sazûmanî herî kêm 78 lêpirsîn û doz hatine vekirin.

Wekî ku ji van lêpirsîn û teqîbatên ku hûn dê kitekitên wan di raporê de bibînin de jî tê xuyakirin, polîtîkayên zext û bizdandinê yên bipergal ku arasteyî pîşeya parêzeran, meqama parêziyê û Baroya me bi zêdehî didomin.

Endamên Çapemenî yên Hêja,

Ji bilî kurteya rapora me, ji ber ku fakulteyên hiqûqê ku her roj ên nû têne vekirin tevî qalîteya perwerdehiya hiqûqê qalîteya darazê jî dadikeve. Mûçeyên CMK'ê ku di wesfa suxreyê de ne, helwest û tevgerên rencdar ên endamên darazê û personelên gelemperî yên hember hempîşeyên me, li salonên danişînê, li yekeyên sepandina qanûnê, li girtîgeh û li deverên ku em pîşeya xwe bi cih tînin parêzer bi awayek bipergal rastî êrîş û gefan tên. Em dixwazin ji vir carek din destnîşan bikin ku, ger parêzer di bin gefê de bin, maf û hiqûqa welatiyan jî di bin xetereyê de ye.

Wek encama hewldana ji qewet xistin û bêqîmethiştina pîşeya parêziyê ya bi rêya bikaranîna amûrên ragihandinê di êrîşên arasteyî hempîşeyên me de zêdebûn tê dîtin. Parêzer Ersîn Arslan ku di rojên borî de di dema hêczê de hate qetilkirin û du roj berê dawî li jiyana xwe anîna Parêzer Muhammed Halîl Yildizî encama van polîtîkayan e. Bi vê minasebetê, em carek din hevalên xwe bi rehmet bi bîr tînin.


Di atmosfera heyî de ku darazê bêalîbûn û serxwebûna xwe bi tevahî winda kiriye, azadiya derbirînê, azadiya çapemeniyê, azadiya birêxistinbûnê, mafê civîn û xwepêşandanê, mafê azadî û ewlehiya kesan û mafên darizandina adil tune tê hesibandin, dêrînî û bendbendîbûna civakî di merheleyek bêhed de ye, em dê hem parastina pîşeya xwe û hempîşeyên xwe hem jî parastina maf û hiqûqa hemwelatiyên xwe bidomînin û di vê rêya xwe de têkoşînê bidomînin. 

Em Parêzer di vê pêvajoya ku li pêşiya azadiya lêgerîna mafan astengiyê çê dike û pirsgirêkên me yên pîşeyî bi hemî giraniya xwe didomin de; Em careke din diqîrin ku em dê rûmet û rêzdariya pîşeya xwe biparêzin, ji bo maf û azadiyên bingehîn bêkêmasî werin bicihanîn em dê bi hemû awayê hewl bidin û zivêr nebin.

Hempîşeyên Min Ên Rêzdar;

Em di 5'ê Nîsanê Roja parêzeran de serokê xweyê ebedî, rehmetî Tahir Elçî, bi rêz û minet bi bîr tînin. Em di hizûra we de carek din dûbare dikin ku em dê şopdarê dosyeya lêpirsînê ya di derbarê serokê xweyê hêja Tahir Elçiyî de ku jiyana xweya pîşeyî ji bo tekoşîna bêcezatiyê terxan kiriye bin.

Di dawiya axaftina xwe de; ji her kesî re di civakek ku bêtir dadperwerî, ji rêzikên hiqûqê yên gerdûnî û mafên mirovan re rêzdarî heye de; siberojên ku aştî serdest e û ji bo bêdengkirina parastinê hewl nayê dayîn dixwazim û 5'ê Nîsanê Roja Parêzeran li hemî hempîşeyên xwe pîroz dikim.

Bi Rêzdarî.

 

NAVENDA MAFÊN PARÊZERAN A BAROYA AMEDÊ